KAWIT, CAVITE — Tampok sa pagdiriwang ng Pistang Soledad 2026 ang ika-20 anibersaryo ng parokya, na ipinagdiwang sa pamamagitan ng Kumpilang Bayan, Misa Concelebrada, at Procession Engrande.

Pinangunahan ni Lub. Kgg. Reynaldo G. Evangelista, D.D., Obispo ng Imus, ang Kumpilang Bayan na sinundan ng Misa Concelebrada bilang bahagi ng pagdiriwang ng kapistahan ng Mahal na Birhen ng Soledad.

Sa kaniyang homiliya, binigyang-diin ng obispo ang malalim na pakikiisa ng Mahal na Birhen sa pagpapakasakit ng Panginoong Hesukristo. Sa pagninilay sa pagdadalamhati ni Maria sa paanan ng Krus, ipinaalala niya na bahagi rin ng buhay ng mga mananampalataya ang pagharap sa sakit at dalamhati.

Gayunman, hindi sa dalamhati nagtatapos ang paglalakbay. Binanggit ng obispo ang pagkabuhay na muli ni Hesukristo bilang tanda ng tagumpay at kagalakan, na siyang ipinagkakaloob din sa mga nananatiling tapat sa Diyos.

Iniugnay rin niya ang pagninilay sa ika-20 anibersaryo ng parokya, na kumikilala sa dalawampung taon ng biyaya sa ilalim ng kalinga ng Birheng Maria de Soledad. Ang katapatan ni Maria sa pakikiisa sa buhay ni Hesus ay nagsisilbing paalala sa mga mananampalataya na manatiling tapat sa kanilang sariling paglalakbay ng pananampalataya.

Binigyang-diin din ng obispo na ang pangako ng Diyos sa mga tapat sa Kanya ay buhay na walang hanggan, na siyang patutunguhan ng bawat Kristiyanong nakikipaglakbay kasama ni Kristo.

Bilang pagtatapos ng pagdiriwang, isinagawa ang Procession Engrande, kung saan sama-samang pinarangalan ng mga mananampalataya ang Mahal na Birhen ng Soledad kasama ang mga banal na imaheng bahagi ng prusisyon.

Kabilang sa mga inilabas sa prusisyon sina San Jose, Nuestra Señora de la Paz y Buen Viaje, Mahal na Birhen ng Soledad, Santa Rita de Cascia, at Santa Isabel at San Zacarias.

Naging tampok sa prusisyon ang pagsasama-sama ng mga debosyon na bahagi ng buhay ng pamayanang Katoliko sa Kawit. Sa pamamagitan nito, naipahayag ng mga mananampalataya ang kanilang pananampalataya at debosyon habang ipinagdiriwang ang dalawang dekada ng buhay ng parokya.

Sa pagtatapos ng Pistang Soledad 2026, muling ipinagkatiwala ng pamayanan sa Diyos at sa Mahal na Birhen ng Soledad ang patuloy na paglalakbay at misyon ng parokya, habang pinananatili ang pananalig sa pangako ng Diyos na buhay na walang hanggan.