SILANG, CAVITE – Sa kabila ng masungit na panahon, ginanap ngayong Setyembre 4, 2026 ang Catechetical Celebration 2026 na may temang "Pakikinig: Synodal Journey for one mission" ng Diyosesis ng Imus sa Divine Mercy Parish Biluso, na dinaluhan ng mga katekista mula sa iba’t ibang bahagi ng diyosesis.

Nagsimula ang pagdiriwang sa pambungad na pananalita at pagtanggap ng Kura Paroko na si Rev. Fr. Eric M. Orcullo, OFS, na sinundan ng Banal na Misa na pinangunahan ni Most. Rev. Reynaldo G. Evangelista, D.D., Obispo ng Imus.

Sa kanyang homiliya, binigyang-diin ni Bishop Evangelista ang mga biyayang ipinagkakaloob ng Diyos sa mga katekista, gayundin ang mga responsibilidad na kaakibat ng kanilang paglilingkod. Kasama rin sa pagdiriwang si Rev. Fr. Reiner R. Dumaop, Priest Animator ng Ministri sa Katekesis, at mga katuwang na pari.

Sinundan ito ng isang talk na pinangunahan ni Rev. Msgr. Pedro Gerardo O. Santos, Ed.D., PC, na tumalakay sa mahahalagang katangian at kaalamang kinakailangan sa pagbibigay ng katekismo. Ibinahagi rin ang halimbawa ni Ka-Luring bilang huwarang katekista.

Binigyang-parangal naman ang mga katekistang umabot na sa 30 taon ng tapat na paglilingkod sa larangan ng katekesis.

Sa pagtatapos ng pagdiriwang, pinasalamatan ni Rev. Fr. Reiner ang mga katekista sa kanilang pakikiisa at buong pusong pag-aalay ng sarili sa kanilang misyon, bago igawad ang huling pagbabasbas.

Naging makabuluhan ang pagdiriwang sa pamamagitan ng sama-samang pakikiisa ng mga katekista at pagkilala ng Diyosesis ng Imus sa kanilang mahalagang papel sa pagpapatuloy ng misyon ni Hesus na magturo at magbahagi ng pananampalataya.

GMA, CAVITE – Ginanap ngayong Setyembre 2, 2026 ang oryentasyon at unang sesyon ng Pastoral Care Volunteer Training Program Batch #13 sa San Jose Manggagawa Parish ng Ministri sa May Karamdaman.

Dinaluhan ito ng mga kinatawan mula sa nasabing ministri at iba't ibang ministri sa Diyosesis ng Imus. Pinangunahan ito ni Rev. Fr. Michael Ceazar Dela Cruz, ang Priest Animator, kasama si Ms. Malorna Mosico, ang Lay Pastoral Worker ng nasabing ministri. Magkakaroon ito ng total na walong sesyons na gaganapin tuwing Miyerkules.

Saklaw ng mga pagsasanay ang kaalaman sa pangangalaga sa mga may sakit, hindi lang pisikal na pangangalaga, kundi pati pang-isipan at espiritwal na pangangalaga. Ipinapakita nito ang pagbibigay-halaga ng Simbahan sa mga may sakit.

NAIC, CAVITE — Namahagi ng 200 food packs ang Byaheng Malasakitan sa mga kababayang nangangailangan sa Sto. Niño de Bancaan Parish noong Agosto 26, 2026, sa pakikiisa ng Metrobank Foundation, Caritas Philippines, at Ministri sa Pangingisda, upang makapaghatid ng pagkain, pag-asa, at malasakit sa mga komunidad na nangangailangan.

Isinagawa ang relief operation bilang bahagi ng patuloy na humanitarian response ng mga katuwang na organisasyon para sa mga pamilyang nangangailangan ng suporta sa gitna ng mga pagsubok na kanilang kinakaharap.

Sa isinagawang distribusyon, personal na naiabot sa mga benepisyaryo ang mga food packs, kasabay ng pakikipag-tulungan ng mga volunteers na nakiisa sa operasyon.

Higit pa sa pagkain, naging pagkakataon ang Byaheng Malasakitan upang maipadama sa mga benepisyaryo na ang paglilingkod ay hindi lamang tungkol sa pagbibigay ng materyal na tulong, kundi tungkol din sa presensya, pakikinig, at pagkalinga sa kapwa.

Sa pamamagitan ng sama-samang pagkilos, patuloy na ipinapaabot ng Byaheng Malasakitan hindi lamang ang tulong, kundi ang mensahe na sa panahon ng pangangailangan, may mga taong handang makiisa at tumulong.

TERNATE, CAVITE — Sa gitna ng pinsalang iniwan ng bagyo, muling ipinakita ng Simbahan ang malasakit sa mga pamilyang higit na naapektuhan nito, partikular ang mga mangingisda.

Umabot sa 200 food packs ang ipinamahagi sa mga benepisyaryo sa komunidad na nasasakupan ng Sto. Niño de Ternate Parish , bilang tugon sa pangangailangan ng mga pamilyang nawalan o nabawasan ng kabuhayan dahil sa epekto ng bagyo.

Pangunahing nanguna sa pamamahagi ang Caritas Imus, katuwang ang Ministri sa Pangingisda, Caritas Philippines, at Metrobank Foundation.

Para sa mga mangingisda, hindi lamang pagkain ang hatid ng tulong, kundi isang paalala na sa panahon ng pagsubok, hindi sila nag-iisa. Sa bawat food pack na kanilang natanggap, dala rin nito ang pag-asa na unti-unti silang makababangon at makapagsisimula muli.

Julugan, Tanza, Cavite — Agosto 26, 2026. Isang makabuluhang pagdiriwang ng pananampalataya, pagkakaisa, at pasasalamat ang ginanap sa Parokya ng Muling Pagkabuhay (The Resurrection Parish) sa Julugan, Tanza, Cavite, noong Agosto 26, ganap na ika-3 ng hapon. Tampok sa pagdiriwang ang pagbabasbas sa bagong pintuan ng simbahan at sa magandang retablo ng altar.

Pinangunahan ng Lubhang Kagalang-galang Obispo Reynaldo G. Evangelista, D.D., Obispo ng Diyosesis ng Imus, ang pagbabasbas, kasama ang mga kaparian ng Diyosesis. Naging bahagi rin ito ng pagdiriwang ng kapistahan ng patrona ng parokya, si Santa Monica, na isang mahalagang panahon para sa sambayanan upang muling pagnilayan ang kanilang pananampalataya at pagtatalaga sa Panginoon.

Sa pangunguna ng Kura Paroko na si Reberendo Padre Marco Cyril Convento, kasama ang mga lingkod ng simbahan at mga mananampalataya, naging ganap ang pagkakaroon ng bagong pintuan at retablo sa pamamagitan ng sama-samang pagtutulungan at malasakit ng buong sambayanan.

Higit pa sa pisikal na kagandahan ng mga bagong istruktura, ang pintuan at retablo ay nagsisilbing konkretong pahayag ng pagkakaisa, pananampalataya, at pasasalamat sa Diyos. Ang bawat ambag, pagsisikap, at pakikiisa ng mga mananampalataya ay naging bahagi ng isang adhikaing pagandahin hindi lamang ang tahanan ng Diyos kundi ang lugar kung saan sama-samang nagtitipon ang sambayanan upang manalangin, makinig sa Salita ng Diyos, at ipagdiwang ang Banal na Eukaristiya.

Ang bagong pintuan ay higit pa sa isang pasukan. Ito ay paanyaya, paanyayang pumasok sa tahanan ng Diyos, lumapit sa Kanya, at makatagpo ng kapayapaan sa panalangin. Sa bawat pagbubukas nito, nawa’y maalala ng bawat pumapasok na laging bukas ang puso ng Diyos sa Kanyang mga anak.

Gayundin, ang retablo sa altar ay nagbibigay ng maringal na paalala sa tunay na sentro ng buhay-pananampalataya: si Kristo. Sa altar, ang sambayanan ay nagkakaisa upang ipagdiwang ang Eukaristiya, alalahanin ang dakilang pag-ibig ng Panginoon, at muling tanggapin ang lakas upang mamuhay bilang mga tagasunod Niya.

Sa ganitong paraan, ang bagong pintuan at retablo ay hindi lamang mga bagay na nagpapaganda sa simbahan. Ang mga ito ay nagiging simbolo ng isang pamayanang marunong magkaisa, magmalasakit, at magbigay ng sarili para sa ikabubuti ng sambayanan.

Nawa’y ang bawat makapasok sa pintuang ito ay makaranas ng katahimikan ng panalangin; ang bawat tumingin sa altar ay higit na mapalapit kay Kristo; at ang bawat makibahagi sa buhay ng parokya ay makatagpo ng isang pamayanang may pusong bukas sa pagmamahal at paglilingkod.

Sa pagdiriwang ng kapistahan ni Santa Monica, nawa ang sambayanan ay mamuhay sa matiyagang pananalangin, pagmamahal sa pamilya, at matatag na pananampalataya.

Maligayang Kapistahan, Santa Monica!

Nawa’y patuloy na pagpalain ng Panginoon ang The Resurrection Parish, ang mga lingkod nito, at ang lahat ng mananampalatayang sama-samang bumubuo sa isang pamayanang nagkakaisa sa pananampalataya, nagmamalasakit sa isa’t isa, at naglilingkod nang may pagmamahal.

GENERAL MARIANO ALVAREZ, CAVITE — Patuloy na inaanyayahan ng Ministri sa mga May Karamdaman ng Diyosesis ng Imus ang mga layko na may puso para sa paglilingkod na makilahok sa Pastoral Care Volunteer Training Program na gaganapin sa San Jose Manggagawa Parish, General Mariano Alvarez (GMA), Cavite.

Isasagawa ang pagsasanay sa Setyembre 2, 2026, Miyerkules, mula 9:00 AM hanggang 12:00 NN, na naglalayong ihanda ang mga magiging Pastoral Care Volunteers sa pakikinig, pag-alalay, at pakikiisa sa Simbahan sa pastoral na pangangalaga sa mga kapatid na may karamdaman at kanilang mga pamilya.

Hinihikayat lalo na ang mga interesado mula sa mga parokya at pamayanang malapit sa GMA, Carmona, Silang, Dasmariñas, at iba pang karatig na lugar na magpadala ng mga kinatawan sa naturang pagsasanay.

Ayon sa ministri, ang programa ay para sa mga laykong handang matuto at maging katuwang ng Simbahan sa pagpapakita ng habag, pag-asa, at mapagpagaling na pag-ibig ni Kristo sa mga taong may karamdaman.

Bukas pa ang pre-registration, ngunit limitado lamang sa 60 kalahok ang maaaring makibahagi sa pagsasanay.

Para sa karagdagang impormasyon at pagpapatala, maaaring makipag-ugnayan kay Rev. Fr. Michael Ceazar C. Dela Cruz, Animator ng Ministri sa mga May Karamdaman, sa 0946 191 8595, o kay Sis. Ma. Lorna Mosico, Lay Pastoral Worker, sa 0928 292 2505.

Inaanyayahan ng ministri ang mga parokya at komunidad na makiisa sa misyong ito at sama-samang matutunan kung paano maging presensya ng pagmamalasakit at pag-asa para sa mga kapatid na nangangailangan ng pastoral na kalinga.

DASMARIÑAS, CAVITE – Isang makabuluhang pagdiriwang ng pananampalataya ang dinaluhan ng mga mananampalataya ng Mabuhay City, Dasmariñas, Cavite sa isinagawang Maringal na Rito ng Pagtatalaga ng Altar, Dambana, at Simbahan ng Parokya ni San Agustin noong Linggo, Agosto 23, 2026, ganap na ika-5:00 ng hapon.

Pinangunahan ng Lubhang Kagalang-galang na Obispo Reynaldo G. Evangelista ang banal na pagdiriwang, kasama sina Rev. Fr. Geoffrey Zacarias at Rev. Fr. Ashpaul Castillo, gayundin ang mga layko, at mga debotong naging bahagi ng makasaysayang pagdiriwang.

Ang pagtatalaga ng isang simbahan at altar ay isang mahalagang ritwal sa buhay ng isang pamayanang Katoliko. Sa pamamagitan nito, ang lugar ay pormal na iniaalay at inilalaan para sa pagsamba sa Diyos, lalo na sa pagdiriwang ng Banal na Eukaristiya at iba pang mga banal na pagdiriwang.

Higit pa sa pagiging isang gusali, ang bagong itinalagang simbahan ng Parokya ni San Agustin – Mabuhay City ay nagsisilbing tahanan ng pananampalataya at sentro ng buhay-pamparokya. Dito nagtitipon ang sambayanan upang manalangin, makiisa sa Eukaristiya, tumanggap ng mga sakramento, at sama-samang isabuhay ang misyon ni Kristo.

Sa pamumuno ng kanilang paring pastol at sa patuloy na pakikiisa ng mga mananampalataya, nawa’y maging bukal ng pananampalataya, pagkakaisa, paglilingkod, at pagmamahal sa kapwa ang Parokya ni San Agustin para sa buong pamayanan ng Mabuhay City.

Ang makasaysayang pagtatalaga ay nagsisilbing panibagong yugto sa buhay ng parokya, isang paanyaya sa lahat na patuloy na maglakbay bilang isang sambayanan ng Diyos, nakaugat kay Kristo at handang maging saksi ng Mabuting Balita.

BINAKAYAN, KAWIT, CAVITE — With deep gratitude and Marian devotion, the faithful of the Diocesan Shrine and Parish of Our Lady of Fatima in Binakayan gathered for a solemn Holy Mass presided over by Luis Antonio Cardinal Tagle, commemorating the anniversary of the first coronation of the beloved image of Nuestra Señora del Rosario de Fatima de Binakayan, affectionately known by her devotees as “Imang.”

The image of Imang has been intimately connected with the history and faith of the people of Binakayan for decades. Originally from Portugal, the image was gifted in 1966 by the American couple Mr. and Mrs. Eugene Coneley to then-Manila Archbishop Rufino Cardinal Santos, who subsequently entrusted it to Bishop Artemio Casas of the Diocese of Imus. The image eventually became the cherished Marian patroness of the community.

A significant milestone in this history came with the Decree of Episcopal Coronation of Imang signed by then Imus Bishop Luis Antonio G. Tagle on August 22, 2008, although the rites of coronation was held on May 13, 2009. The crown used for the occasion was a gift from the Shrine of Our Lady of Fatima in Portugal. 

Thus, Cardinal Tagle’s presence at the shrine carried a profound sense of continuity. The same cardinal who, as Bishop of Imus, once placed the episcopal crown upon Imang was once again welcomed by the faithful who had witnessed the growth of her devotion—from a cherished Marian image of a parish community to a Marian image honored with a Pontifical Coronation.

The Pontifical Coronation granted by the mandate and authority of Pope Francis on May 1, 2025 represents the culmination of a long journey of faith. It does not replace the earlier devotion of the people of Binakayan; rather, it affirms and elevates the profound Marian devotion that has flourished in the community for generations.

For the faithful of the Diocesan Shrine and Parish of Our Lady of Fatima, Imang remains not simply a crowned image, but a mother who continually leads her children to Jesus Christ. Her message remains the same: prayer, conversion, repentance, reparation, and peace.

As the faithful continue their journey with Imang, the crowns placed upon her head point beyond the image itself—to Christ, her Son, who is the true King and source of every grace.

ROSARIO, CAVITE — Umabot sa 200 food packs ang ipinamahagi sa mga maliliit na mangingisda sa Ligtong, Rosario, noong Agosto 24, 2026, ganap na alas-9:00 ng umaga, bilang tulong sa mga pamilyang naapektuhan ng bagyo.

Isinagawa ang distribusyon sa pakikipagtulungan ng Ministri sa Pangingisda, Kaisahan ng mga Maliliit na Mangingisda ng Ligtong, Caritas Imus, Caritas Philippines, Metrobank Foundation, at San Isidro Labrador Parish – Ligtong.

Layunin ng programang ito na makatulong sa pangangailangan ng mga mangingisda at kanilang pamilya, lalo na sa mga naapektuhan ng bagyo. Sa sama-samang pagkilos ng mga katuwang na organisasyon, naihatid ang tulong at malasakit sa mga mangingisda ng Ligtong, Rosario, sa gitna ng epekto ng bagyo.

BACOOR, CAVITE — Umabot sa 163 kabataan ang nakiisa sa Youth Leaders Conference 2026 ng Ministri sa Kabataan ng Diyosesis ng Imus sa St. Michael Institute of Bacoor Inc., na nakatuon sa pagpapalakas ng pamumuno at pakikibahagi ng kabataan sa misyon ng Simbahan.

Tampok sa pagtitipon ang Creative Prayer, animation, Pastoral Planning Workshop, talakayan sa mga action plan, Diocesan Youth Ministry Business Meeting, at paghahanda para sa World Youth Day 2027 sa Seoul, South Korea.

Inilunsad din ang Diocese of Imus Youth Ministry Guidelines, na nilagdaan ng mga kinatawan mula sa bawat vicariate bilang gabay sa pagpapatupad ng youth ministry sa diyosesis.

Inanunsyo rin na ang Vicariate of Our Lady of Candelaria ang magiging venue ng Youth Leaders Conference 2027.

Dumalo rin si Most. Rev. Reynaldo G. Evangelista, D.D., Obispo ng Imus, at nagpaabot ng mensahe ng suporta at paghihikayat sa mga kabataan ng diyosesis.

Nagtapos ang pagtitipon sa Banal na Eukaristiya at Paghahayo, bilang panawagan sa kabataan na maging aktibong katuwang ng Simbahan sa misyon at paglilingkod.

JULUGAN 8, TANZA, CAVITE — Nagsama-sama ang Diyosesis ng Imus at mga katuwang nitong organisasyon sa pamamahagi ng 200 food packs sa mga benepisyaryo sa Julugan 8 Covered Court noong Agosto 21, 2026, alas-8:00 ng umaga.

Isinagawa ang relief operation sa pakikipagtulungan ng Caritas Imus, Caritas Philippines, Metrobank Foundation, The Resurrection Parish, Parish Simbahayan Team, at Ministri sa Pangingisda na nagkaisa upang maihatid ang tulong-pagkain sa mga pamilyang nangangailangan.

 Sa pamamagitan ng sama-samang pagkilos ng Diyosesis at mga katuwang nito, layunin ng programa na makatugon sa pangangailangan ng mga benepisyaryo at maipakita ang konkretong malasakit at paglilingkod ng Simbahan sa komunidad.

Patuloy na isinusulong ng Diyosesis at ng mga katuwang nito ang diwa ng pagkakaisa, malasakit, at paglilingkod, bilang konkretong pagsasabuhay ng pananampalataya sa pamamagitan ng pagtulong sa kapwa.

NAIC, CAVITE — Aabot sa 200 food packs ang ipamamahagi sa mga pamilyang naapektuhan ng pagbaha sa ilang komunidad sa Naic, Cavite ngayong Agosto 19, 2026, kung saan prayoridad ang mga mangingisda at iba pang pamilyang lubos na naapektuhan ng kalamidad.

Layunin ng isinagawang relief operation na makapagbigay ng agarang tulong sa mga pamilyang nangangailangan, partikular sa mga naapektuhan ang kabuhayan at pang-araw-araw na pangangailangan dahil sa pagbaha.

Bawat pamilya ay tatanggap ng isang food pack na naglalaman ng bigas, de-lata, monggo, at kape.

Nagsimula ang aktibidad sa isang maikling programa alas-9 ng umaga sa Bucana Sasahan Chapel, na sinundan ng pamamahagi ng mga relief goods sa mga natukoy na benepisyaryo mula sa Gulod, Munting Mapino, Timalan Concepcion, Timalan Balsahan, at Lontoc 1.

Isinagawa ang relief operation sa pamamagitan ng pagtutulungan ng Metrobank Foundation, Caritas Philippines, Caritas Imus, Ministri sa Pagkalinga, Ministri sa Komunikasyon at Pananaliksik, Ministri sa Pangingisda, at Diocesan Shrine and Parish of the Immaculate Conception, Naic, kasama ang mga boluntaryo at iba pang katuwang sa komunidad.

Binigyang-prayoridad sa distribusyon ang mga mangingisda at pamilyang naging biktima ng pagbaha, bilang bahagi ng pagtugon sa kanilang agarang pangangailangan sa pagkain.

Ipinakita ng aktibidad ang kahalagahan ng pagtutulungan ng mga institusyon, parokya, ministri, volunteers, at iba pang organisasyon upang makatulong sa mga komunidad na nangangailangan, lalo na sa panahon ng kalamidad.

Isinulat ni: John Gabriel Corpuz | Social Communications, Diocese of Imus

LUNGSOD NG DASMARINAS, CAVITE— Nagtipon ang sambayanan ng Parokya ng Hesus Nazareno para sa opisyal na pagtatalaga sa bago nitong kura paroko, Reb. Pd. Ronnie R. Crisostomo, SVD. Ang seremonya ng pagtatalaga ay pinangunahan ng ating minamahal na obispo, Lub. Kgg. Reynaldo G. Evangelista, D.D.

Ang pagtatalaga ay ipinagdiwang ng mga kaparian mula sa Society of the Divine Word (SVD), kabilang na rito ang dating kura paroko ng nasabing parokya na si Reb. Pd. Teofilo “Popo” Perey, SVD, pati na rin sina Reb. Pd. Peter Vu Tran, SVD, Reb. Pd. Randy Flores, SVD, Reb. Pd. Dondion Soriano, SVD, at ang kasalukuyang parochial vicar ng Parokya ng Hesus Nazareno na si Reb. Pd. Elmer Flores, SVD kasama ang mga bisita mula sa kanyang dating tungkulin sa Diocesan Shrine of Jesus the Divine Word at mga seminarista ng SVD — isang magandang paalala na ang misyon ng Simbahan ay ibinabahagi at sinusuportahan ng isang mas malawak na komunidad.

 Ang araw na ito ang nagsisilbing simula ng pangalawang tungkulin ni Padre Ronnie sa parokyang ito, matapos siyang unang maglingkod dito mula 2015 hanggang 2017. Ngayon, puno ang simbahan at bawat upuan ay puno — habang mainit na tinatanggap ng mga parokyano at mga tagapaglingkod ang pastol na kanilang minamahal. Sa homiliya, pinagnilayan ng ating Obispo ang mga pagbasa at ang mabuting balita tungkol sa isang babaeng Cananea na ang pananampalataya ay hinamon ngunit hindi kailanman nasira at nakatanggap ng awa ni Kristo.

Ayon sa ating obispo, “Sapagkat kung ano man ang iyong lahi, kulay, at estado sa buhay, kung ano man ang iyong pinag-aralan, iisa lamang ang plano ni Hesus —  Iyon ay tayo’y maligtas.” Pinaaalalahan niya tayo na ang pagliligtas ng Panginoon ay walang kapantay, at tayo’y mga instrumento ng pagpapahayag sa pag-ibig ng ating Panginoon sa atin. Ang mga mananampalataya at lingkod-simbahan ay inaanyayahan, “Tayong mga lingkod ng simbahan at mga mananampalataya, tayo’y maging instrumento upang hikayatin natin ang ating mga kapatid na magsimba — sapagkat lalago ang pananampalataya sa pamamagitan ng pagsisimba at pagdarasal sa araw-araw.”

 Sa naganap na solemneng pagtatalaga, si Fr. Ronnie ay sinamahan ng ating minamahal na obispo sa ilang mga parte ng simbahan upang basbasan ang benditahan, kumpesyonaryo, at sa tabernakulo na sumisimbolo sa parokyang ipinagkakatiwala na sa kaniya. Bago umupo bilang opisyal na kura paroko, sinundan ito ng isang pagpapakita ng pagkakaisa kung saan nagpalitan ng mainit na yakap sina Reb. Pd. Ronnie Crisostomo, SVD at ang ating minamahal na obispo.

Ipinakita sa ebanghelyo kung paanong ang babaeng Cananea ay nagtiwala nang walang pag-aalinlangan sa awa ni Kristo, gayundin ang komunidad na ito ay nagtitiwala sa plano ng Panginoon para sa bagong kabanatang ito ng kanilang paglalakbay — nagkakaisa sa pananampalataya, pag-asa, at pagmamahal (kawanggawa) kasama si Reb. Pd. Ronnie Crisostomo sa kanilang tabi.

Written by: Niña Brioso | Social Communications, Diocese of Imus