Noong ika-8 ng Agosto 2025, matagumpay na ginanap ang taunang Karakol ng Parokya ng Santa Candida Maria de Jesus bilang paggunita sa kapistahan ng mahal na patrona. Lumahok ang iba't ibang Chapel Community bilang pagpapakita ng kanilang debosyon at pagmamahal kay Santa Candida.

Binagtas ng prusisyon ang mga kalsada ng Ciudad Nuevo Phase 5, Phase 4, Phase 2, at nagtapos sa Phase 1 Covered Court. Sa bawat hakbang at indak, masiglang inalay ng mga deboto ang kanilang Sayaw Pasasalamat—isang makulay na pagsasayaw bilang tanda ng pasasalamat at pananampalataya.  

Sa huling bahagi ng selebrasyon, ipinamalas ng bawat komunidad ang kanilang mga talento sa sayaw bilang alay ng papuri at pasasalamat sa patrona. Naging simbolo ito ng pagkakaisa, pananampalataya, at masiglang espiritu ng komunidad.

Ang Karakol ay bahagi ng taunang tradisyon ng parokya tuwing kapistahan ni Santa Candida. Layunin nitong patatagin ang ugnayan ng bawat miyembro ng komunidad sa pananampalataya at sa isa’t isa.

Sa temang “Santa Candida: Kapanalig at Kalakbay ng mga Umaasa sa Diyos,” muling pinagtibay ng parokya ang pananalig nito. Sa kabila ng mga hamon ng panahon, nananatiling buhay ang debosyon at pagkakabuklod ng mga mananampalataya. 

(Ulat ni Jharmella H. Bartiana. Mga piling larawan mula sa MPK ng Sta. Candida de Jesus.)