Pagtatalaga ng Simbahan at Altar ng Pangdiyosesanong Dambana ni San Agustin at Parokya ng Sta. Cruz 

Payak, tahimik, lubhang mataimtim, puno ng pasasalamat, puspos ng biyaya, at tigib ng pag-asa. Ganito nga ang namayani sa pinagpalang Araw ng Pagtatalaga ng Simbahan at Altar ng Pandiyosesanong Dambana ni San Agustin at Parokya ng Sta. Cruz.

Noong ika-3 ng Mayo 2026, kasabay ng Pagdiriwang ng ika-1700 Kapistahan ng Pagkakatagpo sa Banal ng Krus ng ating Panginoong Hesus, naganap ang panibagong kasaysayan sa ating pananampalataya, debosyon, at kultura. Pormal nang itinalaga ang iniayos at pinagandang Dambana ni San Agustin at Parokya ng Sta. Cruz. Bunga ng pinagsama-samang pagmamalasakitan, pagtutulungan, sakripisyo, at panalangin, naging matagumpay ang pagdiriwang.

Sa pangunguna ng Lub. Kgg. Reynaldo G. Evangelista, D.D., Obispo ng Imus, kasama ang mga Paring Anak ng Tanza, ang kadiliman sa pagsisimula ng Rito ay sadyang nagdala ng liwanag at panibagong pag-asa sa Bahay Dalanginang magiging daluyan ng marami pang biyaya mula sa mga Sakramento. Ito ang masidhing paalaala sa atin na sa ating pagdedebosyon kay Tata Usteng, tayo ay kanyang sinasamahan. Tayo ang Bayan ng Diyos, ang mga binyagan at batong buhay na bumubuo sa templong espiritwal at banal.

Higit sa pisikal na gusali at magandang mga ornamento, ang malalim na hiwaga ay sumasaatin sapagkat tayong mga mananampalataya ang itinatalaga sa Diyos upang maghayag ng Mabuting Balita at ng mga kahanga-hanga Niyang gawa kung saan nananahan ang pag-ibig at nabubuklod ang sambayanan.

- Vicvic Llego, miyembro ng Ministri sa Pananaliksik at Komunikasyon ng Diocesan Shrine of San Agustin de Tanza)