KAWIT, CAVITE - Buong pusong ipinagbunyi ng mga mananampalataya ng Diyosesis ng Imus, kaisa ang mga deboto ng pinakamamahal na Ina at Reyna ng Bayan ng Kawit, si Nuestra Señora del Rosario de Fatima de Binakayan, o mas kilala bilang "Imang," ang kaniyang koronasyong pontifikal. Naganap ang makasaysayang seremonya noong ika-1 ng Mayo, 2025, ganap na ika-5:00 ng hapon, sa Diocesan Shrine and Parish of Our Lady of Fatima — Binakayan, Kawit, Cavite. Pinangunahan ni Apostolic Nuncio to the Philippines, Lubhang Kagalang-galang Charles John Brown, D.D., ang pagpapatong ng korona sa Mahal na Birhen, katuwang si Lubhang Kagalang-galang Reynaldo G. Evangelista, D.D., Obispo ng Imus. 

Ang Lub. Kgg. Reynaldo G. Evangelista, D.D., Obispo ng Imus, ay nagbahagi ng kaniyang mensahe, “𝐼 𝑎𝑚 𝑠𝑢𝑟𝑒, 𝑃𝑜𝑝𝑒 𝐹𝑟𝑎𝑛𝑐𝑖𝑠, 𝑤ℎ𝑜 𝑤𝑎𝑠 𝑐𝑎𝑙𝑙𝑒𝑑 𝑏𝑦 𝐺𝑜𝑑 𝑡𝑜 𝑒𝑡𝑒𝑟𝑛𝑎𝑙 𝑙𝑖𝑓𝑒 𝑙𝑎𝑠𝑡 𝐴𝑝𝑟𝑖𝑙 21, 𝑀𝑜𝑛𝑑𝑎𝑦 𝑖𝑛 𝑡ℎ𝑒 𝑂𝑐𝑡𝑎𝑣𝑒 𝑜𝑓 𝐸𝑎𝑠𝑡𝑒𝑟, 𝑖𝑠 𝑗𝑜𝑦𝑓𝑢𝑙𝑙𝑦 𝑤𝑎𝑡𝑐ℎ𝑖𝑛𝑔 𝑢𝑠 𝑓𝑟𝑜𝑚 ℎ𝑒𝑎𝑣𝑒𝑛.”  Matatandaan noong ika-15 ng Oktubre, 2024 ay nilagdaan ng Mahal na Santo Papa Francisco ang koronasyong pontifikal para sa Mahal na Birhen ng Fatima. 

Ayon naman kay Apostolic Nuncio, Lub. Kgg. Charles John Brown D.D., sa kaniyang homilya, “𝑇ℎ𝑒𝑟𝑒'𝑠 𝑎 𝑠𝑎𝑦𝑖𝑛𝑔 𝑎 𝑚𝑜𝑡𝑡𝑜, 𝑎 𝑠𝑙𝑜𝑔𝑎𝑛 𝑖𝑛 𝐶𝑎𝑡ℎ𝑜𝑙𝑖𝑐 𝑇ℎ𝑒𝑜𝑙𝑜𝑔𝑦 𝑎𝑏𝑜𝑢𝑡 𝑀𝑎𝑟𝑦 𝑤ℎ𝑖𝑐ℎ 𝑔𝑜𝑒𝑠 ℎ𝑒𝑟𝑒 𝑖𝑛 𝐿𝑎𝑡𝑖𝑛 “𝐷𝑒 𝑀𝑎𝑟𝑖𝑎 𝑁𝑢𝑛𝑞𝑢𝑎𝑚 𝑆𝑎𝑡𝑖𝑠”, 𝑤ℎ𝑖𝑐ℎ 𝑡𝑟𝑢𝑙𝑦 𝑚𝑒𝑎𝑛𝑠, 𝑎𝑏𝑜𝑢𝑡 𝑀𝑎𝑟𝑦 𝑖𝑡 𝑖𝑠 𝑛𝑒𝑣𝑒𝑟 𝑒𝑛𝑜𝑢𝑔ℎ. 𝑊ℎ𝑎𝑡 𝐼 𝑚𝑒𝑎𝑛?  𝑊𝑒 𝑐𝑎𝑛 𝑛𝑒𝑣𝑒𝑟 𝑠𝑎𝑦 𝑒𝑛𝑜𝑢𝑔ℎ 𝑎𝑏𝑜𝑢𝑡 𝑀𝑎𝑟𝑦. 𝑊𝑒 𝑐𝑎𝑛 𝑛𝑒𝑣𝑒𝑟 𝑟𝑒𝑎𝑙𝑙𝑦 𝑝𝑟𝑎𝑖𝑠𝑒 𝑀𝑎𝑟𝑦 𝑠𝑢𝑓𝑓𝑖𝑐𝑖𝑒𝑛𝑡𝑙𝑦 𝑏𝑒𝑐𝑎𝑢𝑠𝑒 𝑀𝑎𝑟𝑦 𝑎𝑠 𝐼 𝑠𝑎𝑖𝑑 𝑖𝑠 𝑡ℎ𝑒 𝑀𝑜𝑡ℎ𝑒𝑟 𝑜𝑓 𝐷𝑖𝑣𝑖𝑛𝑒 𝐺𝑟𝑎𝑐𝑒, 𝑀𝑎𝑟𝑦 𝑖𝑠 𝑡ℎ𝑒 𝑀𝑜𝑡ℎ𝑒𝑟 𝑜𝑓 𝑡ℎ𝑒 𝑆𝑎𝑣𝑖𝑜𝑟, 𝑀𝑎𝑟𝑦 𝑖𝑠 𝑜𝑢𝑟 𝑀𝑜𝑡ℎ𝑒𝑟 𝑖𝑛 ℎ𝑒𝑎𝑣𝑒𝑛.”

Bilang pagkilala sa makasaysayang koronasyon, opisyal na inanunsyo ng Pamahalaang Lungsod ng Kawit, Cavite, ang pagkilala kay Nuestra Señora del Rosario de Fatima de Binakayan bilang Ina at Reyna ng Kawit. Tunay na puspos ng galak ang bawat mananampalataya sa biyayang ito. 

Matatandaang ang Sta. Maria Magdalena ang inang parokya ng kasalukuyang Diocesan Shrine and Parish of Our Lady of Fatima Binakayan bago pa ito maitalaga bilang ganap na parokya noong 1966 sa pangunguna ni Reb. Pdr. Luciano Paguiligan na siyang napagpasyahan na ang Mahal na Birhen ng Fatima ay ang magiging patrona ng parokya. Mula sa biyaya ng deklarasyon, ang mag-asawang Mr. & Mrs. Eugene Conolly na mula sa New York City at siyang deboto ng Mahal na Birhen ng Fatima ay nagkaloob ng regalong imahen ng mahal na birhen na nagmula pa sa Portugal para sa mga mananampalataya sa Binakayan. Makalipas ang ilang taon hanggang sa maitatag ito bilang Diocesan Shrine at ngayo'y nakatanggap na ng koronasyong pontifikal ay patuloy na nagkakaroon ng himala ng biyaya na nagpapausbong at nagpapalalim pa ng pananampalataya ng bawat deboto ni Imang. (Ulat ni Binea Jeverly C. Antang, SOCCOM — Diocese of Imus, Larawang kuha ni Noel Orcullo, SOCCOM — Diocese of Imus)


__________________________________________________________________________
Visit our website and follow our official social media accounts:
Website: https://www.dioceseofimus.org/
Facebook: https://web.facebook.com/dioceseofimus
Jubilee 2025 Facebook page: https://www.facebook.com/Jubilee2025DioceseOfImus
Youtube: https://www.youtube.com/@dioceseofimus1961
#ImangPONTIFICALCoronation
#FatimaBinakayan
#DSPOLFB
#FatimaSHRINECavite
#FatimaSHRINEBinakayan
#Jubilee2025
#LakbayPagAsa
#PilgrimsofHope
#DioceseOfImus