SILANG, CAVITE - Ang mga labi ni Rev. Fr. Engelbert A. Bagnas ay payapang naihatid sa kaniyang huling hantungan noong ika-2 ng Mayo, 2025, sa Himlayan ng Pastol na matatagpuan sa Divine Mercy Parish, Biluso, Silang, Cavite.

Isang Banal na Misa ang inialay para sa kaniyang kaluluwa, na pinangunahan ni Lubhang Kagalang-galang Reynaldo G. Evangelista, D.D., Obispo ng Imus, kasama ang maraming kaparian mula sa iba't ibang parokya ng lalawigan ng Cavite. Nakibahagi rin sa huling pamamaalam ang kaniyang mga mahal sa buhay, mga matalik na kaibigan, at ang kaniyang dating mga parokyano.

Si Fr. Engel ay kilala bilang kauna-unahang kura-paroko ng Parokya ng San Gabriel Arkanghel sa Barangay San Francisco, General Trias, Cavite, kung saan siya ay naglingkod nang tapat at buong puso.

Maraming salamat Fr. Engel, sa buhay na naging ilaw sa marami, ika'y isang pastol na naglingkod nang buong puso, ngayo'y nagpapahinga sa piling ng Dakilang Pastol.  Kapayapaan kailanman ang igawad ng Maykapal sa yumao nating mahal.  Siya nawa ay silayan ng Ilaw na walang hanggan.  Mapanatag nawa sa kapayapaan. Amen. (Mga larawan mula sa St. Gabriel the Archangel Parish FB Page)

+ Rev. Fr. Engelbert Alinaya Bagnas 
Araw ng Kapanganakan: Nobyembre 13, 1971
Ordinasyon sa Pagkapari: Abril 18, 2005
Araw ng Kamatayan: Abril 27, 2025